給解憂專員的信

//【050期 解憂 · 空間】

為來信者排難解憂,不再是電影《解憂雜貨店》的情節﹗青協現已推出流動車「解憂號」,讓公眾將心事投放至「解憂樹」,並由解憂專員給予回信,分擔煩憂。

 

我今年16歲,成日都覺得好煩惱好困擾,咩都唔想做,好想放棄。生活上好似遇到好多我解決唔到嘅問題。冇一個朋友鍾意我同埋肯幫我。我呢啲感覺其實係咪錯?

「我真係好欣賞你,你對於自己嘅情緒狀況好了解,唔係每個人都咁清楚講到自己嘅感受㗎!唔使擔心,我深信每個人都經歷過你呢個階段,而且情緒冇分對與錯、好與壞,只係在於我地點樣面對、處理唔同嘅情緒。當你某種感覺特別強烈嘅時候,代表嗰件事對你嘅影響好深。 有時候朋友都未必會完全明白你嘅感受,但咁樣並唔代表你就係孤單。我好願意喺度同你一齊分擔你嘅苦惱,唔好忘記身邊有好多人同事,值得你愛。遇到困難嘅時候,仲有解憂號同埋我會陪伴住你!」

 

我好想放棄。我覺得自己好冇用。我好憎我嘅身體,但係每次我傷害完自己之後,我就更加憎自己。有陣時……我真係好想就咁完結晒所有嘢。

你並唔係冇用,或者你只係暫時迷失咗。每一個人都係獨特同有價值㗎。你一定經歷緊好艱難嘅時期,先會令到你諗過放棄。唔知呢種感覺困擾咗你幾耐呢? 我明白呢啲感受係好難向人啟齒,好多謝你信任我,願意同我傾訴。我好欣賞你咁勇敢,至少直至呢一刻你都未放棄,咁已經係一件好唔簡單嘅事。我相信,一定有某啲好重要嘅嘢支撐住你。你願意畀我陪住你走過低谷嗎?只要你有需要,我會隨時喺你身邊支持你。

 

我想做警察,已經報考咗幾年,但係無論我幾努力,始終都係過唔到體能測試。我可以點樣做?

我感受到你對做警察好有熱忱。據我所知,考警察要過五關斬六將,一啲都唔容易,所以我真係好欣賞你嘅堅持。 對於體能測試唔合格,你可以嘗試搵出唔合格嘅原因。會唔會係速度唔夠快?體力唔夠?嘗試針對改善自己嘅不足,訂立一個明確嘅目標,循序漸進鍛鍊自己嘅體能。如果身體真係負荷唔到,你會唔會考慮其他體能要求冇咁高嘅紀律部隊?我相信你最後一定可以搵到自己理想嘅工作。加油!

 


解憂專員有話兒

每次閱讀解憂信時心中都有一股莫名的感動,畢竟於傳統中國社會,要與陌生人分享自己的心底話絕不容易。 大部分解憂信都來自年輕人,信中有人講述他們迷失了;有人懷疑自己的存在價值;有人尋找不了生命意義……解憂樹提供了一個渠道,讓人學習透過文字表達內心感受。拿起一封封因書寫力度有異而凹凸不平的信件,讀著讀著,彷彿走進了信中人的內心世界,窺探他們一個個屬於自己的秘密,也因而感受到每封信的重量。縱然未能一一幫助每位有需要的人,但願這世界會因為解憂號和解憂樹的出現,變得美好一點。

 

/ 青協全健思維中心